低薪、高工時按怎解？ 3總統候選人政見護勞權

保障勞工權益的上低工資法，佇咧舊年12月總算三讀通過，濟濟勞工團體攏向望未來會當改善弱勢勞工的生活。低薪的問題，一直攏是社會大眾非常關心的代誌，三組總統候選人，也捌佇政見發表會提出解決的方案。

侯友宜提出「守護勞工七箭」的政見，向望對加薪、增加歇假天數等等，來改善低薪、高工時的困境。

國民黨總統候選人侯友宜講，「第一件勞工加薪企業減稅，第二件守護弱勢降低稅金，第三件增加歇假天數、勞動尊嚴閣升級，第四件保障勞保基金永續發展，第五件起造勞工住宅，第六件保障非典型勞工權益，第七件修訂三法勞權加碼。」

抑若柯文哲是認為，低薪是教育出問題，致使教出來的學生無符合社會的需要，伊表示家己選牢以後，除了高等教育，技職教育嘛會仝款重視。

民眾黨總統候選人柯文哲表示，「咧臺灣目前是欠工和低薪攏有，理論上欠工就應該高薪、哪會低薪，這表示咱學校教出來的學生，無符合社會企業上的需要，所以這有學用落差的問題，我會共重視高教 輕視技職的教育政策，改做高教和技職並重，來強化產業銜接解決學用落差。」

另外，賴清德是提出提懸勞工的薪水的政見，伊講未來選牢、會根據物價指數抑是經濟成長指數，來調整勞工的薪水，嘛欲鼓勵資方提懸提撥退休金。

民進黨總統候選人賴清德指出，「必須愛提懸勞工的薪水，除了發展經濟予產業升級，會當有愈濟高附加價值的工課以外，我也會運用蔡英文總統任內，所推動過的勞工基本薪資法案，運用物價指數，根據物價指數抑是經濟成長的指數，來調整勞工基本的薪資。」

根據行政院主計總處的統計，台灣的GDP自2000年到2022年成長率有到130%，但是低薪卻一直攏是勞工上鬱卒的代誌，影響著結婚生囝、買厝等等的生活規畫，濟濟勞工團體攏捌呼籲企業應該愛和勞工分享經濟成果，但是欲按怎維護、促進勞工的權益，未來的執政者，猶是愛好好仔思考。