「柑仔色惡魔」來臺7工全紀錄 加深臺日情誼

踏著活潑的跤步、展現青春活力，身穿一軀柑仔色制服，怹就是予人叫做「柑仔色惡魔」的日本橘高校吹奏樂部，怹佇咧12/9受中華文化總會的邀請，來臺灣一禮拜，佇高雄、臺北各地頭和學校演出，文總共翕做紀錄片，內底嘛記錄著怹參與臺北第一女中120周年校慶的交流演出，學生之間嘛互相變做好朋友。

日本京都橘高校吹奏樂部學生表示：「真歡喜會當佇跨國的情形交著朋友，而且我感受著逐家仝款為著演出，做伙拍拚的感覺，予我感覺非常歡喜。」

舊年京都橘高校吹奏樂部受邀請來到咱的雙十大會演出，表演誠精彩，濟濟臺灣民眾看甲真感動，嘛變做怹的迷眾，可惜彼陣因為疫情，無法度四界去體驗臺灣文化。今年中華文化總會和民間企業主動出力，閣一改共怹邀請來體會臺灣人的熱情。

中華文化總會秘書長李厚慶表示：「其實欲來進前就有列清單，食的部份就差不多欲20項，欲去的景點嘛有10幾个所在，雖然講無去夜市，毋過飯店內面有佈置做夜市的模樣，真正共臺灣正港的小食，整理起來體驗臺灣夜市的氣氛。」

橘高校吹奏部12/14佇咱國家音樂廳辦音樂會，代表致詞的學生講怹非常感謝會當佇臺灣演出，濟濟人目屎含目墘。文總表示佇交流的過程中間，看著學生互相約束以後欲閣見面，透過這改嘛愈深化臺日的友誼，怹原仔非常感動。