農業青年大使「新南向」 月底去印尼、菲律賓交流

「擛動你的大旗」

農業青年大使接過大旗，也擔起新南向國家交流的重擔。逐年外交部和農業部攏會徵選農林、漁牧背景的少年家，去新南向國家交流產業的經營發展，今年按算自10月底開始分做兩團，前往印尼佮菲律賓。農業部講，嘛因為咱進前經過巴西卵的風波，欲按怎去確保區域糧食的食安議題就愈重要。

農業部政務次長陳添壽表示，「咱的雞卵，這个新南向這款的政策，到底伊的意涵是啥物，上主要是愛會當佇，區域糧食安全方面互補，這是非常重要的。」

這屆計共有24位農業青年大使欲去進行交流，發揮怹佇種作、病蟲害預防防治，和畜牧、水產養殖等等的專業背景。今年印尼團由第五屆的百大青農林欣樺ﰓ領，另外菲律賓團是由有機種作背景的青農許榮恩ﰓ團，怹講除了食安、和推廣臺灣產銷履歷的做法，也向望有技術的交流。

農業青年大使許榮恩講，「阮團隊內底各領域的攏有，像阮種作農業、園藝種作、然後畜牧、水產養殖，阮團內拄好三个領域攏有，若是這个物件會當過去怹彼爿，其實通幫助怹的收成。」

農業青年大使林欣樺也講，「阮是希望講去遐，會使做一寡栽培技術的交流，嘛想欲知影講咧極端氣候的影響，ﰀ是按怎來因應。」

農業青年大使團隊，怹向望會當和新南向國家建立合作平台，共臺灣農業永續和環保的理念推捒出去，外交部和農業部也期待透過國際交流，會當深化咱農業創新的能量。