臺南改造歸仁圓環車路線 交通事故減少35%
發布時間：
更新時間：
臺南歸仁圓環長期以來車濟、交通複雜，捷發生車禍。經過臺南市交通局改造圓環了後，這交通事故發生率也降低35%。交通部共九月訂做交通安全月，學校也拍拚宣導交通安全。臺南市警察局表示會加強稽查，也會掠較絚。（此則新聞標題、導言、內文皆為臺語文。）
圓環內的車來來去，全台灣上濟圓環的城市就佇臺南，其中歸仁圓環往過定發生交通事故，這馬歸仁圓環無仝囉，交通局共原本機車道提掉，空間用來畫槽化線，嘛保留停車的空間，閣設人行道標線參過路人的庇護空間。交通局指出，改造半冬了後，圓環的交通事故發故降35%。毋過有民眾煞反應，定定改來改去，予in霧嗄嗄。
在地民眾表示，「一直改來改去希望講，伊以後會使固定看欲按怎，莫講抹掉閣重畫。」
臺南市交通局的交通管制科股長林樹德說明，「用路人使用歸仁圓環，駛車的秩序佮慣勢，包括過路人的動線上的問題，阮會閣全面滾動式做檢討。」
改造圓環，主要欲提升過路人的路權，九月拄好是交通安全月，佇學校，in實際☒囡仔過車路，共交通安全教育向下釘根。
臺南市紅瓦厝國小學生，佇學校學習：「慢、看、停、聽」「過車路我會攑手」
臺南市政府警察局歸仁分局副局長 徐百瑄說明，「1到8月份阮針對，路口無讓過路人的取締件數170件，無號誌路口無停車駕駛，取締是85件。」
今年六月底，駕駛愛讓過人的新法上路，雖罔讓過路人的情形有改善，毋過猶是有人無守規矩。台南市警察局表示，會加強稽查、取締。
洪家馨/編輯
