水上龍德村門牌寫「十一指厝」 臺語音地號名

社區發展協會的牌匾頂面，寫著龍德社區發展協會佮龍德村辦公室的字，但是邊仔門牌，認真共看是著寫十一指厝，嘉義縣水上鄉的龍德村，問庄內的人，逐家攏知影這地號名，煞攏毋知影原因。

水上鄉龍德村民：「毋知影咧，古早就按呢號矣。」、「知影叫十一指厝，毋知影由來是啥物」

嘉義縣水上鄉的龍德社區，過去庄內有十一口井，所以叫十一井厝，後來會變做十一指厝，是因為日本時代戶政單位，聽無臺語造成的誤會。

社區文史工作者林俊男表示，「日本時代 日本統治臺灣辦理戶籍登記，然後畢竟臺灣人佮日本人語言袂通，所以在地人會講十一井厝，日本人可能誤會聽做十一指厝。」 

十一指厝老村長林茂豐講：「井佮指仝彼个音差無偌濟，In日本人聽的時陣，聽落講十一指去。」

水上鄉長林緗亭：「十一井厝 到最後變十一指厝，伊嘛是有伊的歷史背景，地方的一个調查，文化保存的物件應該想辦法用出來，予後一代的人會當知影，家己故鄉的故事。」

地方文史工作者講，以前的井，這嘛攏已經坉平，所以庄內知影十一指厝由來的人，嘛愈來愈少。鄉公所表示，雖然較早的井已經坉平，但是這馬庄內閣有寫十一指厝的門牌，希望透過文史的紀錄佮調查，來保留地方的發展佮故事。