竹市古蹟"下竹町" 有人胡亂頓印.上重罰200萬

佇新竹市有90年歷史的「下竹町」 ，是日本昭和時期的警察宿舍，這馬煞傳出受人破壞，共本底提供予遊客頓印仔做紀念的印仔，有人刁工提去頓佇宿舍的牆頂。文化局表示:這款破壞的行為、已經違反文化資產保存法，上懸會當罰200萬。
查埔人越頭看來看去，紲落來竟然提紀念印仔，直接tǹg著有90年歷史的壁堵頂懸，文化局志工發現了後，煞按怎嘛無法度創清氣，罵講實在真過分。
文化局志工表示：「阮有用水試看覓，敢有辦法創清氣（仝款攏拭袂掉)，因為這是白灰材質的壁面，所以墨汁已經食入去壁面，根本無法度完全清除。」
民眾表示：「實在想袂到哪會有人佇遮爾媠的歷史建築頂懸，做遮過分的動作，實在誠無公德心。」
新竹市文化局指出，目前當咧釐清對方的身分，這款行為恐驚已經觸犯文化資產保存法，會當罰30萬以上、200萬以下的罰款。
新竹市文化局文資科長 邱珮瑜表示：「目前警察已經咧揣嫌犯，等揣著人阮會叫伊針對破壞的部分做復原，呼籲民眾維護古蹟以及修復工程，其實攏愛開袂少氣力，嘛愛靠逐家的共識參公德心。」
這間起佇1935年的日本式建築，過去是用來做警察宿舍，後來經過整理誠無簡單才對外開放，文化局希望逐家來遮參觀時，會當共同來保護歷史建築。