母親節欲到 嘉義剪絨仔花今年產量較減.價數大起

這禮拜就是母親節，逐家慣習買剪絨仔花送媽媽，予花店這陣仔是誠無閒，店頭家講，今年剪絨仔花的量少，所以價數比舊年懸，毋過買的人猶是誠濟。

花店業者謝小姐說:「買氣誠好，這幾工閣拄著媽祖天上聖母生日，所以對花的需求有較濟、較大，所以有一寡花的價數攏起2、3倍。」

嘉義市是國內種剪絨仔花第二大產區，花農講今年量減三成，減少的原因，是因為進前疫情減少種作面積。

花農李建欣說:「像我個人就減種三成以上，所以今年產量變少然後疫情閣解封，進前像我手頭這種，濟蕊的品種，一支是四箍到六箍，今年的價數，大約佇十箍到十二箍。」

民眾侯小姐說:「有，有貴較濟，舊年像按呢才二百五，今年是三百五。」

花農講，今年的雨水較少，但是嘉義市灌溉的水源有夠，所以今年花的生長攏袂䆀，加上疫情解封，有較咧慶祝，今年母親節的剪絨仔花，真有銷，價數佇這站仔嘛有較懸的情況。