烏面抐桮飛來歇冬 布袋鹽田辦渡鳥季拚觀光

民眾用千里鏡來看渡鳥，嘉義縣政府佮雲嘉南國家風景區管理處，佇布袋鹽田的溼地，做伙舉辦渡鳥季活動，吸引誠濟民眾參加。

民眾林先生表示：「以烏面抐桮來講，有一部份攏會來遮，變做這爿的數量，可能會比七股彼爿，目前閣較濟。」

雲嘉南國家風景管理處長陳煜川表示：「替咱社區替生態來重視，繼續共生態佮經濟，閣有這部份的旅遊，結合起來。」

這个所在佇2001年無閣曝鹽了後，300外公頃的範圍沓沓仔成做渡鳥過冬的棲地，高雄野鳥學會、荒野保護協會，閣有在地的社區，頭擺佮公部門合作，希望用旅遊的方式，發展地方的經濟，嘛推廣生態教育。

民眾劉先生表示：「早期咱應該是講，咱賞鳥的所在，上好是佇鰲鼓溼地，這兩冬布袋鹽田，應該是復育了袂䆀。」

布袋串聯西南沿海溼地，是臺灣西岸重要的生態環境，今年烏面抐桮來遮的紀錄有1429隻。雲嘉南風管處表示，配合NGO組織佮縣府水利單位的合作，會當予這个所在，成做有生態教育閣有觀光發展的新所在。