民團發起"228‧0行動" 行過歷史地點.面對真相
鄭雅文林郁凱 /台北報導
發布時間：
更新時間：
目次
二二八咧欲到矣，蔡瑞月舞蹈研究社佮鄭南榕基金會等團體，今仔日(2/21)開記者會，宣佈今年的228.0紀念行動，會號召民眾做伙上街頭遊行，行過相關歷史的地點，叫醒社會重視歷史傷痕。
用手語念1947年的春天這首詩，蔡瑞月舞蹈研究社等民間團體穿烏衫，佇白布踏出血跤印，象徵無法度抹除的傷疼，宣佈228彼日的228.0紀念活動，記者會也特別用台語，望台灣人講家己的話，認捌這段過去。
做伙來講台語理事長 張小雅：「咱台灣人是按怎，失去咱家己的語言，失去咱家己的文字，若準咱這个儀式，愛用中國話，數念咱家己失去的人，按呢正義佇佗位。」
代誌發生已經過76冬，發起團體表示這款疼痛袂當放袂記，也呼籲今年第7改行動，所有的人上街頭，佇228早起會對天馬茶房集倚，遊行到行政院，也就是較早的行政長官公署，要求政府嚴正面對歷史真相，處理中正紀念堂、蔣介石銅像等等的議題，應該閣較積極。
228.0紀念行動宣言起草人 郭潤庭：「執政到今促轉會成立閣解散矣，毋過臭頭仔廟佮慈湖，猶原佇遐，開咱台灣人的錢佮資源，也無應該討論啥物號做，臭頭仔廟轉型，咱應該愛做的就是先拆，拆了才來講彼塊地按怎使用。」
民間團體認為，執政黨這幾冬偏向處理安慰受害者，毋過若無處理加害者，受害者永遠有新的空喙，這改二二八事件七十六週年，遊行當工會以台語客語來讀受難者的名單，表達受難者、家屬閣有台灣社會袂赴哭出喙的心聲。
呂尚儒/編輯
2022杭州亞運 台灣百金之路
