傳藝2023看家戲再現 傳統戲曲帶家齣大拚戲

「人笑駙馬食軟飯，無恩准我毋敢踏出門。」
一代薄情郎陳世美，敢真正有遐爾歹？薪傳歌仔戲團推出看家戲「陳世美．反奸」，用男主角的立場，去討論婚姻內底的心酸佮無奈。
薪傳歌仔戲團總監 張孟逸：「啥物環境、伊拄著啥物代誌，予伊變做這款人，大部份陳世美佮秦香蓮，攏是古早的古冊戲，這馬變做講，少年人咧看戲的時陣伊有啥物想法，捙倒原本表演的方式，這就是咱這馬欲揣的。」
國立傳統藝術中心主辦「2023看家戲再現」系列，以重塑經典為主題，包括歌仔戲、布袋戲、京戲在內，總共邀請七个藝文團體將古早戲齣重新編造，除了劇情切的角度無仝以外，聲光的效果嘛加添變化。
「銀河轉斗上星回」
臺北柴尪仔劇團推出「秦瓊倒銅旗」，特別注重武戲的部份，加入北管演奏，團長講弄尪仔的師傅閣愛經過特別的訓練。
臺北木偶劇團長 林永志：「毋但愛會曉武戲，戲尪仔嘛愛出力，家己嘛愛唱，就是連拍帶唱的，一个身段的戲，老師傅攏會穿木屐蹔柴板，毋管攑刀抑是攑槍就會有力。」
「2023年看家戲再現」，3月18開始，佇國立傳統藝術中心連紲演出七場經典戲齣。