新北"安坑輕鐵"通車 方便新店區接臺北市區

安坑輕鐵十四張站四箍圍的人陣是插插插，安坑輕鐵經過7年的工程，初十開始試營運，就算十四張站下晡開始落大水雨，猶是無減民眾的興趣。

民眾林先生表示：「排兩點外鐘，毋捌坐過，坐一擺看覓仔。」

民眾李先生表示：「其實真緊，坐起來真四序。」

金色的列車沓沓駛離開車站，是真搶目，安坑輕鐵全長7.5公里，總經費166億，計共有9个車站。佇咧早時的通車典禮，新北市長侯友宜表示，安坑輕鐵使用國產設備的比率達到42%，也提供沿線居民方便的大眾運輸。

新北市長侯友宜表示：「是咱文山地區，代表是新店地區新的路站碑，咱在地這个所在會當通到三峽，閣會當到大台北地區，接十四張站，會使快速到咱生活中心，會當減少15到20分鐘的時間。」

毋過安坑輕鐵的運量，佇網路頂也受著質疑，部份民眾認為對附近居民來講，坐安坑輕鐵到台北市區閣愛換車，若坐公車、是顛倒較方便。

民眾李先生表示：「以安坑的老居民來講，可能攏慣勢坐公車矣，而且攏對新店坐入來安康，所以才會感覺淡薄仔麻煩。」

民眾黃小姐表示：「我感覺輕鐵猶是真方便，因為我對景文科大站出發，行百外公尺就到車站，車站就直接接捷運，我免佇外口搧風沃雨。」

有民眾認為，雖然當地人往台北市區可能較慣勢公車，但是若到板橋，會使由安坑輕鐵接環狀線到位，會方便真濟；毋過也需要民眾慣勢盤車。民眾敢會接受安坑輕鐵，就看紲落來一個月的試營運成績。