嘉義縣廢票率超過全國平均 嘉市長選戰受關注

今年嘉義縣長選舉投票數有28萬4490票，其中無效的票有1萬1196票，廢票率有3.9%，中正大學的學者認為，嘉義縣會有這款的結果，可能嘛是選民對執政的民進黨佮挑戰的國民黨雙爿，攏無滿意的反應。
中正大學政治學系教授 蔡榮祥表示：「所謂的冷感就是講，民眾用跤投票。跤投票的意思就是講，無去投，彼工就離開毋去投票，但是毋是按呢，是到投票所了後，正常的情況應該是揀一个人頓，但是煞頓兩个，這種的現像，我感覺猶是需要觀察」

針對嘉義縣出現廢票懸的情況，現任的嘉義市長黃敏惠表示，雖然進前選舉嘉義市無選市長，毋過其他選舉的廢票率只有1.9%，表示選民對目前施政有滿意，民進黨嘉義市長候選人李俊俋嘛表示，縣市兩邊的狀況無仝，對選民誠有信心。

嘉義市長國民黨候選人 黃敏惠表示：「面對未來，阮有規畫未來的施政藍圖，請逐家佇12/18一定愛出來投票」

嘉義市長民進黨候選人 李俊俋表示：「嘉義市計共有84个里，84个里我已經佇這改的選舉攏走透透，就是一步一跤印，予逐家閣較了解阮的政見」

12月18嘉義市的市長選舉，閣賰十外工，黃敏惠按算初七開始請假欲來投入選戰，李俊俋嘛繼續辦活動，爭取選民的認同，兩爿攏呼籲民眾愛出來投票，決定嘉義市未來的發展。