2022年世界盃跤球賽佇卡達開幕,毋過外界攏咧關注有真濟起這个場館外籍移工過勞死亡,抑是予頭家欺負等等。國際特赦組織臺灣分會,佮臺灣外籍工作者發展協會,舉辦座談會,邀請逐家做伙看紀錄片,關心移工的困境和權益。
這支紀錄片「移工之盃」,講的是一陣去到卡達(Qatar)幫當地政府佮國際跤球總會起運動場所的移工。In攏是上低層的苦力,頭家無照起工發薪水,而且定定加班、行動受著限制。
臺灣外籍工作者發展協會創辦人 徐瑞希表示:「遮爾大的運動比賽內底,竟然有遮爾濟無公平、無合理,甚至是剝削人的權利的代誌。咱希望全世界的移工,會當得著合理的勞動權利保障,甚至是性命的保障」
為著證明遮的移工有受著照顧,國際跤球總會特別舉辦移工跤球比賽。毋過透過紀錄片,逐家攏知影,遮的人其實無peh起去世界舞台的可能,國際特赦組織臺灣分會表示,希望這支紀錄片,會當提醒逐家關心移工的權利
國際特赦組織台灣分會秘書長 邱伊翎表示:「臺灣國內有70萬移工人口,咱所面對的移工人權問題,其實佮咱看著的卡達,in所面對的議題其實是真成,包括真貴的中人費用,抑是護照無法度自由使用」
除了播送紀錄片,國際特赦組織臺灣分會佮臺灣外籍工作者發展協會嘛發起連署,向望透過社會的力量,阻止卡達政府侵害移工的人權。