新竹起上久的建案 工期到今已33冬猶未完工

大型機具佇工地內底櫼甲滿滿，當咧趕工，斟酌共看，外口告示牌頂懸，施工期間竟然是寫對民國84年到117年，算算的這棟30層的大樓，竟然愛起33冬，民眾看著感覺真好奇。

民眾表示：「最近才拄開始動工，毋過遮確實已經圍起來有一段時間，顛倒是這馬的厝，一般攏起了誠緊，我是感覺真驚人。」

附近民眾講其實這个建案今年初才動工，市府嘛回應，這个建案是佇民國84年依法申報，依照彼當時的工期標準，建照目前猶未過期。

新竹市都發處副處長翁嘉陽表示：「本案民國84年依法申報開工，依照當時工期核算標準，建照目前並無過期，到今仝款有效，隨新竹市建築管理自治條例，民國90年發布實施了後，檢討工期標準，目前已經無這款案例。」

負責建案的代銷公司表示，地主是一般的傳產公司，準備欲起住宅大樓，當初申請建照了後無連鞭開發，一直到舊年才開始賣，因為這棟大樓是佇新的自治條例實行進前就提著建照，所以一切攏合法施工。