第57屆金鐘獎戲劇類 陳亞蘭提著最佳男主角

今年的金鐘獎佇昨昏頒獎結束,會當看著咱臺灣的歌仔戲受真大肯定,毋但是陳亞蘭以「嘉慶君遊台灣」,成做頭一个提著男主角獎的女性,唐美雲的「孟婆客棧」嘛有得著戲劇節目創新獎。

歌仔戲小生陳亞蘭,以嘉慶君這个角色,成做臺灣歷史上頭一个提著金鐘男主角獎的女性。

佇慶功宴,穿男性的se-bi2-looh,展出皇帝的架勢,陳亞蘭以家己做例,鼓勵演員繼續拍拚做家己,因為無啥物代誌是無可能的。

第57屆金鐘視帝 陳亞蘭講:「得著這个進前攏無例,會使講是開創歷史的獎項,我感覺全世界攏無人按呢做,臺灣行佇時代的上頭前」

臺大臺灣文學研究所副教授 鄭芳婷表示:「這佇臺灣猶閣有世界來講,攏是一件真有意義的代誌。伊代表咱娛樂產業,佇過去一直當做理所當然的性別框架,總算受著搖泏」

歌仔戲佇今年的金鐘獎除了創造這个歷史,結合歌仔戲佮音樂劇的孟婆客棧嘛得著戲劇節目創新獎。孟婆客棧用情境喜劇的形式佮現代的劇本,邀請無仝背景的演員、歌手演出,予歌仔戲毋但是古早的傳統戲曲,嘛是會使面向市場的大眾作品。

孟婆客棧製作人 唐美雲講:「我用臺灣上在地的歌仔戲,共逐家講歌仔戲袂落伍,歌仔戲足奅的。歡迎閣較濟少年人行入歌仔戲的世界」

遮的歌仔戲演員想欲用in的熱情予逐家知影,歌仔戲毋但會當佇戲棚跤搬,嘛會當佇金鐘獎的台頂,接受逐家的噗仔聲。

相關新聞