用公費替爸母買機票? 高虹安:若有請款隨退選

民眾黨新竹市長參選人 高虹安表示：「去國外出差一兩年，爸母厝內的人想欲來看一下，而且我攏是用家己的錢，機票錢攏是我用家己的錢買的，予爸母來美國。」
一講著爸母，民眾黨的新竹市長參選人高虹安，目屎咧欲流落來，針對外界質疑佇資策會的期間，連爸母的機票錢攏是用公費，高虹安強調絕對無這回事。
民眾黨新竹市長參選人 高虹安表示：「面對遮濟代誌，我只有勇敢繼續拍拚，我希望選舉會使上軌道，無需要逐工去面對網路頂懸，莫名其妙的風聲。」
對手民進黨參國民黨的市長參選人，攏針對高虹安敢有用公費讀博士等等閣再提出質疑，認為高虹安應該向逐家講清楚。
民進黨新竹市長參選人 沈慧虹表示：「市民想欲了解的，對家己的代誌要講予清楚，因為市民欲選的是一个有誠信、願意講清楚，有勇氣面對問題的候選人。」
國民黨新竹市長參選人 林耕仁表示：「公眾人物尤其是候選人，對任何代誌攏愛真誠懇，坦白面對一切。對資策會這項代誌，請高候選人家己應該向外界講清楚。」
離投票日賰個月外，新竹市長的選情目前三跤㧣的局勢，未來敢會閣產生啥物款的變化，逐家攏真關心。