70年老三合院翻做"溫兜"圖書館 予社區囡仔讀冊

社區營造的老師，佇埕斗教逐家染色，學員佇厝內外無閒手頭的工課。老師講，自從厝主共這間三合院整理好勢，社區營造的課，開始有好的發展。

社區營造老師 凃健庭：「伊的地嘛足闊，就是講阮來操作遮的工藝課程，有誠大的幫贊，像這種稻埕若欲曝，抑是欲囥物件嘛足方便的。」

這間七十外年的老厝，經過兩冬的整理，室內改做會當予囡仔讀冊的所在，本身咧做國小老師的主人講，過去細漢的成長記持，予伊想欲整理這間老厝提供予在地的囡仔，而且就號做「溫兜」。

「溫兜」的厝主葉珈㚬：「我自細漢的時陣就是，感覺遮攏無所在會當予我讀冊，我攏一定愛去嘉義市區，所以想講我若大漢了後，我會當為我的故鄉做啥物代誌，我感覺著就好矣。」

溫兜佇假日的時陣有社區營造佮地方創生的課程，平常時嘛有開放予人佇遮看冊，未來嘛希望會當配合無仝的單位，予這間老三合院、替這个老社區加添新的活力。