5/1火車總取消 臺鐵演練引導旅客改坐高鐵.客運

五月初一台鐵全面無發車，若猶是有旅客到車頭來詢問，欲按怎做？台鐵25佇台北車頭演練，提供旅客高鐵、國光客運等等替代方案，針對部份國光客運無法度到的車站，閣再提供遊覽車支援運作的「類火車」，目標是予所有旅客有車通坐。

臺鐵臺北站站長 胡詠芝表示，「阮嘛協請鐵路警察局共構單位，就是高鐵、北捷、桃捷，猶有國光客運佮臺北轉運站，鬥陣來做支援猶有協助。」

交通部長王國材到現場視察表示，已經開始約工會對話，尤其是火車駕駛聯誼會的部份。目前伊猶是希望有轉踅的機會，若是溝通成功，無排除會使臨時開車幫。

交通部長 王國材表示，「針對條文內底佗位īn有疑慮的部份，阮會一條一條來討論，若閣退回草案，公司化就遙遙無期。」

臺鐵產業工會秘書長 魏豫綾表示，「無應該佇工會表示抗議的時陣，閣用非常強硬的手段情緒勒索工會。上應該做的代誌應該是正面回應工會的問題，好好共社會大眾交代講，īn認為公司化等於安全這件代誌，愛按怎認為是相仝的。」

4/25的演練，佇全台五个車站舉行。王國材表示，演練結束了後，類火車車幫、詳細應變計畫等等，會佇26召開檢討會議，做較幼路的調整，27中晝佇台鐵網站公佈完整計畫。