大甲媽今日下晡到新港 大陣警察嚴守防起事
林緯廷 / 嘉義報導
發布時間：
更新時間：
大甲媽繞境今仔日中晝到嘉義新港，因為這幾工有發生暴力事件，嘉義縣派大陣警察顧守。參加繞境的香燈跤表示，因為疫情人數有較少，行起來較輕鬆。
雲林縣佮嘉義縣兩爿警方交接，大甲媽佇4/11中晝，正式來到嘉義縣新港鄉。
「感謝聖母繞境虎尾分局，平安順利保佑眾生，鞠躬，禮成，三鞠躬，恭迎大甲媽祖繞境新港。」
大甲媽九日八暝的繞境，逐冬攏有誠濟信眾會來參與，信眾表示，因為疫情的關係人無往過遐濟，感覺較好行，嘛有注意防疫，佇沿路提供食物的信眾嘛講，IN共物件一包一包包予好勢，減少做伙食物件的情況。
隨香信眾，郭先生表示：「家己有做防疫，其他的猶是會煩惱。」
隨香信眾，李小姐表示：「就莫睏佇宮廟，莫佇密閉的空間，酒精喙罨攏隨時紮咧。」
在地信眾，何小姐表示：「今年用這个袋仔，因為防疫期間，所以用袋仔貯起來。」
奉天宮表示，到目前為止，已經有發8、9千張３OK卡出去，欲入來廟拜拜的時陣，攏需要檢查這張，嘛有派人佇廟內隨時提醒民眾共喙罨掛好勢，希望共防疫做周全，莫產生疫情的閬縫。
