民雄"青盲仙"捌替8總統算命 學生辦展覽紀念

共青瞑仙在生的時陣,替人算命的錄音帶放出來聽,中正大學的學生,佇民雄一樂酒家的舊址,舉辦在地傳奇人物青瞑仙柳得男的展覽。

地方文史導覽人 吳至愷:「趣味的所在是,IN共過去的聲音檔案還原,予逐家會當透過聽的過程,然後知影這位捌佇台灣,非常有影響力的算命仙」。

柳得男二新婦 翁旭妍:「會當看著遮的成果,而且誠濟人會當對學生的資料內底,誠完整來了解柳相士」。

本名柳得男的青瞑仙,捌替包括蔣介石、蔣經國、李登輝、陳水扁,國內外八位總統算過命,佇1970年代,就全國出名。舊年中正大學開辦的民雄學,就有學生家己組團隊,經過一冬的資料收集佮整理,完整紹介這位傳奇人物。

展覽召集人 吳泓錡:「嘛共咱仝款攏是平凡的人,只是伊做的是無平凡的代誌,阮嘛是期許講,阮團隊攏誠平凡,嘛當咧做無平凡的代誌」。

民雄七星藥局 吳嘉文:「彼當陣柳相士佇台灣知名度誠懸,無形中帶動旅社產業的發展,大部份來蹛的人攏是欲去算命」。

這个展覽用五个展區,來紹介柳得男佮民雄的關系,閣有伊的故事。策展團隊表示,IN閣有繼續收集青暝仙相關相片佮資料,希望透過這擺的展覽,會當替這位民雄的傳奇人物,揣著閣較濟紀錄。



 

全台敬老金大調查

相關新聞