高雄梓官平均5人就1人著C肝 高醫佇當地開門診
陳嘉筠 賴威佐 / 高雄報導
發布時間：
更新時間：
畫面來源：台灣肝臟學術文教基金會
目次
高雄梓官佇較早平均5个大人就有1个感染C型肝炎。3年前，高雄醫學大學附設病院的內科團隊，佇梓官設立篩檢、治療門診，攏總治療360个C型肝炎的病人，目前這治療成功率有99%。
70歲的戴先生，1冬前才知影家己著肝癌，佳哉才4公分大，開刀治療，這馬人已經健康，伊就是梓官人，當地著C型肝炎的人至少有2成，伊會當提早檢查治療，是因為高醫團隊共篩檢佮治療站，搬來漁村的活動中心。
高醫肝膽胰內科教授 余明隆講：「逐戶篩檢，阮提供在地治療，所以民眾只要騎oo-tóo-bái，2分鐘就會當到篩檢站，兩分鐘到治療站」
這3冬來，高醫針對兩个高風險的里，攏總篩檢5731人，治療360个C肝病人，包括6个肝癌患者，治療成功率有99%，因為目前台灣有上新的治C肝藥仔。另外，高醫嘛發現，真濟C肝病人佮帶原者，完全無病症，甚至肝指數攏正常。
余明隆表示：「著C肝的病人，有一半肝功能正常，傳統先做肝功能，GOT、GPT無正常以後，才來做B肝、C肝是毋著的。應該有風險的民眾攏接受，一世人一擺B肝、C肝的檢查」
衛福部長 陳時中也指出：「阮希望比WHO早5年，佇2025年就達成C肝消除」
高醫佇梓官消除C肝的模式，會當提供其他地區參考，國健署嘛有提供45歲以上民眾，免費B肝C肝檢查，C肝病患若較早治療，就會當避免肝硬化、肝癌。
2022杭州亞運 台灣百金之路
