服裝會當代表一个族群的文化，臺灣這陣也有十四間博物館聯合起來，佇網路展覽逐家己收藏的服裝佮文物，有百外年前的衫仔褲，嘛有史前文物，咱做伙來看這个誠特別的服裝展覽。
小心細膩拍開這領對襟仔衫，敢有發覺，桌仔頂的文物攏是仝款藍紫色的，因為國立臺灣歷史博物館最近發起一項網路博物館時裝週的活動，2022年代表色春仔花藍就是主題。
國立臺灣歷史博物館典藏組長 陳靜寬表示：「阮邀請國內一寡仔博物館，總共有十四个博物館的小編，主要用這个藍紫色，逐家揀出博物館內面，佮藍紫色有關的典藏品做展示」
參加串聯的博物館相連紲貼出in的文物，有服裝、有腰帶、有袚鍊，嘛有四百年前的琉璃珠，屏東海生館貼出的馬糞海膽，攏呼應藍紫色的主題，國立臺灣歷史博物館甚至利用插畫的model穿插來展示，閣教你按怎配，遮的歷史文物看起來嘛真時行。
陳靜寬指出：「對清朝、日本時代到戰後，逐家男性、女性所穿的藍紫色的衫，䘥仔閣有一寡仔配件」
對14萬件的收藏內底，挑選出無仝年代的文物，每一个攏有故事，欲連紲貼出五工，因為疫情舊年博物館的遊客落三成，線頂佮網路成做另外一个展示文物的舞台。