臺北市公有停車場欲起價 1點鐘愛150箍引民怨

台北市的停車格真僫揣,尤其佇一寡仔熱鬧的商圈,市府目前也按算對遮的地區調懸停車費率。

臺北市府停管處處長 李昆振表示:「譬如講佇百貨商圈,咱的公有停車格只有60箍,佇邊仔是百一、百二,結果咱的停車場是規个客滿,規个排隊到馬路,影響著車流。咱的一个使用的時機,會是佇這種特殊時段、特殊區域,針對管理交通上的需求,才會做這款費率的調整」

停管處表示,像西門町峨嵋停車場、松山高中地下停車場,假日費率每點鐘60箍是上懸的,但是未來費率調整的級距上懸可能到百五,也會看大型活動周邊的車格,像聖誕節、跨年暗會信義商圈等等機動調整,主要依市中心,使用率懸周轉率低的停車格,毋是全面調整。

李昆振指出:「目前的費率是廿五冬前定的,經過廿五冬阮重新做修訂,所以留一个較闊的級距。因為阮的管理方式,是累進的方式,這馬上懸是六十箍,八十、一百攏猶未看著,哪會直接跳到百五箍?這是無可能發生的」

停管處也強調,這寡高費率的停車格佇台北市大概會有180格,比率無到0.4%,預計三月初,新費率草案就會送議會審議,若三讀通過上緊後半冬執行。

相關新聞

專題|全台敬老金大調查