老師做導護被挵甲昏迷 全教總籲由專業人員指揮

舊年底高雄鳳翔國中，一名老師佇執行交通導護工課的時，予傱紅燈的轎車挵甲昏迷，引起社會關注老師負擔導護工課的議題。全教總初十開記者會表示，導護工課無應該交予老師來執行，毋過根據in對全國960間國中小的調查，有9成的學校導護工課是交予老師來做，甚至有3成6的學校、學生嘛有參與。

全國教師工會總聯合會理事長 侯俊良表示，「我會記得佮教育部長對談的過程當中，部長認為講應該無學生擔任交通導護，但是事實上阮調查出來的數據，有三成六的學生猶是需要負責。」

全國教師工會總聯合會副秘書長 張旭政表示，「學校老師逐工徛路口上捷拄著的，就是予駕駛人罵抑是差一點仔予挵。這種危險的情形，其實定定佇校園的四箍圍仔出現。」

全教總認為，老師的主要任務應該是照顧校園內的學生，校外的導護工課應該交予義交人員來做。而且校園周邊的道路嘛應該全面調查，設置相關的安全措施。

全國教師工會總聯合會理事長 侯俊良表示，「透過措施的改善，猶閣需要人力的部份，應該是由義交抑是由中央佮地方，共同負擔聘請志工義交等等的方式，經過一定的訓練了後，予īn相當的保障，安置按呢的人力。」

全教總認為，老師若是欲參加導護工課，應該以個人身分，加入受訓練志工團隊。根據遮的訴求，教育部佇記者截稿進前並無提出回應。導護爭議已經20冬外，全教總要求教育部佮相關單位莫閣捒責任。