"虎爺總舖師"桌仔耍 結合課綱教囡仔學臺語

「基隆人、台南人、嘉義人佮宜蘭人，其實一个地區，伊攏有伊的一个特產。」

以地方的食材交換鬥做料理來闖關，也共小學的課綱結合遊戲，予囡仔通那耍那學台語，這套特別的囡仔桌仔耍叫做虎爺總鋪師。

共同創辦人，侯怡安表示：「虎爺佇台灣是一个保護囡仔的動物神，阮就想講這套桌仔耍，是欲做予囡仔人，阮就用虎爺做阮的故事的角色，而且虎爺參台語有錢的好額是倚音，所以阮就想講，也欲予文化好額。」

共同創辦人，石慧婷表示：「像飲水機，早前可能是茶鈷，予囡仔知影講，這馬其實咱啉水，咱可能用飲水機。」

用卡片做比較，予囡仔通比較類似的物件早前參這馬的用詞，這幾个台大學生，用一冬半的時間設計遊戲，共一寡生活詞彙，用台文字展現，也有線頂錄音，予囡仔通共字詞鬥成句，發覺講台語的趣味；𪜶也家己去學台文，希望對自身開始，共少年輩流失的母語閣揣轉來。

共同創辦人，石慧婷表示：「佇學校內底，背單詞、唸歌詩，其實真濟時陣，袂當引發囡仔的學習興趣，所以阮才想講，阮共課本內底真濟硬篤的字詞，搬來這套桌仔耍。」

過去𪜶也捌佇小學內底做推展，這馬閣佇網路平台募資，目前額度閣差一半，希望外界通予𪜶支持，閣較希望每一个囡仔攏通成做家己的總鋪師，共學台語的過程累積出美麗的成果。