刻尪師許協榮特展.專冊 說臺灣布袋戲文化史

布袋戲是臺灣人自古早時代到今重要的娛樂之一,刻尪仔的工夫也綴時代的跤步,愈刻愈幼路。已經刻幾偌十年的許協榮就是刻布袋戲尪仔,真出名的師傅,這馬臺北偶戲館當咧展伊的展覽,也替伊出冊,做伙來看。

尪仔的面形特別、色水光顯、有的角色頭頂閣有生角等等,這是台灣金光布袋戲的特色,佇台北偶戲館,最近也當咧舉辦刻這種尪仔的重要師傅許協榮的特展。

臺北偶戲館長蔡易衛評論許協榮,講「伊刻出來攏非常有特色,做出來效果也袂䆀。所以伊就按呢,算一開始咱原本傳統的布袋戲,落尾開始有金光戲,咱臺灣的特色會當講,是對許協榮這个雕刻師傅開始。」

館長表示,佇50、60年代開始,布袋戲行向內台戲演出,足濟角色原本傳統的攏無,團主等等就會敲電話予刻尪仔師,許協榮厲害的所在,就是伊竟然想會出遮濟尪仔的形貌、創作出真濟特色人物,親像大俠百草翁、前總統蔣經國等等,這改展場就展出欲百身尪仔

導覽員翁子蔓表示,「伊的作品攏是較寫實魔幻的,你真僫想像講,伊只是了解尪仔的,應該是講遮的角色的特色,伊就會當刻出來,攏是伊家己去想的。」

台北偶戲館表示,除了展覽,也新出一本專冊,紹介許協榮師傅的一生佮伊所刻過有代表性的尪仔,希望予外界看著一代匠人的精神,認識這位台灣金光內台戲的重要幕後推動者。
 

全台敬老金大調查

相關新聞