明年軍公教調薪4% 高教工會煩惱專任助理領無

行政院長蘇貞昌拍板定案，明年軍公教人員就欲調薪起4葩，但是高教工會表示，真濟學校抑是政府單位聘用的專任助理，煞因為2017年科技部廢止《專任助理人員工作酬金參考表》，對遮的助理來講，調薪可能是看會著、食袂著。

高教工會秘書蘇子軒：「科技部講媠話欲破除學歷佮年資的迷思，回歸專業能力，所以各學校無閣採用統一的薪資標準。科技部本成可能認為伊是拍開天篷，實際上是共地板提掉。」

工會指出，過去專任助理的薪水會因為年資佮學歷，有調整的機制，但是廢止參考表了後，真濟學校就無調整過專任助理的薪水，甚至有學校開的薪水，比參考表的薪水閣較低，大部份的學校嘛無綴軍公教的調薪機制行。

科技部政務次長林敏聰：「會做一个調查，就是對目前具體敘薪的標準各方面，來看覓是集中佇啥物款的領域，抑是集中佇啥物款的方向，伊的敘薪是無符合阮本來希望的方向。」

科技部表示，本來是希望學校會使以各專任助理的專長等等，家己來調整薪水，這馬無達成效果，會啟動調查，佇有需要的部份，揣一个兼顧基本薪資佮調薪機制的方案。