攝影作品配合裝置藝術 𤆬民眾感受監獄.偵訊室氣氛

關過真濟政治犯的新店監獄,權問罪犯的空間生做啥款咧?攝影家-沈昭良,這馬佇臺灣藝術大學展覽真濟「攝影」結合「裝置藝術」的作品,予參觀的民眾一入去,就會當感受著彼當時的氣氛。

攝影家,沈昭良表示:「予壁本身抑是壁的痕,會使呈現佇目前空間的壁頂,猶閣有阮頭拄仔講的,阮嘛利用現有空間的鐵件,這寡粗的鐵網,透過這款鐵網的物件,成做對作品無仝的觀賞經驗。」

透過展覽現場的成格佮空間配置,參攝影作品結合,新店軍人監獄佮安康接待室兩搭不義遺址的影像,呈現佇展覽現場。

攝影家,沈昭良表示:「像這个樓梯的作品,就是當時佇安康接待室內底,其實伊是兩棟建築起佇一个山坡,頂頭是偵訊的所在,下跤是關押的牢房,這兩棟建築中央伊挖一條。」

攝影家沈昭良透過這款設計,予觀眾會使以無仝的方式來看攝影作品,嘛因為這是開放式的展覽區,民眾會當真容易看著遮的作品、認捌人權議題。

攝影家,沈昭良表示:「予一寡無主動抑是機緣,會使接觸著相關議題的,較濟的人,共同的歷史會使透過按呢的平台,會使有一寡較開放,較有公眾性的展示佮對話的可能。」

這件作品當咧台灣藝術大學「大台北當代藝術雙年展」展出,展覽期間到12月底。沈昭良講,過去這款人權議題,攏佇相關的博物館展出,這馬透過這種開放的展覽,向望會當促進討論,揣著另外一種進步的方式。



 

相關新聞

專題|全台敬老金大調查