各路戲劇相敆匯演 "戲曲夢工場"新戲拍破傳統

布袋戲敢適合演出現代事件?猶閣有歌仔戲、客家戲、京劇這三種戲曲,敢會當結合演出?國立傳統藝術中心主辦的「戲曲夢工場」,今年欲發表六齣突破傳統的作品,予觀眾看著傳統戲曲的實驗精神。

對太魯閣敗馬事件發想,講人生的無常,戲曲夢工場內底,真快樂掌中劇團這齣「掰」佇演出的時,閣透過鏡頭,予觀眾用閣較濟角度來看表演。

導演 柯世宏表示:「觀眾伊若是用我的鏡頭,去看著布袋戲尪仔的尻脊骿,這个布袋戲敢閣是布袋戲?足濟鋩鋩角角的物件,是觀眾看袂著的,所以我就想講既然是按呢的話,按呢咱就來做觀眾一般看較袂著的所在,予觀眾看著」

另外,親像栢優座的「最後5秒,會看見光、看見暗,抑是看見我」,共歌仔戲、客家戲、京戲結合,創作新的演出形式。

戲曲夢工場策展人 張啟豐表示:「無任何一齣是橫空出世、無中生有,就是徛佇傳統去做創新佮實驗。予當代人的心聲,抑是當代人的看法,予人看見、予人了解」

戲曲夢工場收集六齣作品,以傳統戲曲做底蒂,結合古典、現代、西方元素,突破大眾對戲曲的認捌,11月13到12月19,佇臺灣戲曲中心演出。

全台敬老金大調查

相關新聞