400冬歷史.全臺上大 臺南南山公墓拚保留

有400年歷史的臺南南山公墓,是全臺灣上大的古墓區,進前臺南市民政局拍算開發土地。墓仔埔欲按怎處理引起討論。其中有49門墓,有提報保留。臺南市文資處去現場勘查,公民團體有發起連署,希望全區保留。

南山公墓範圍有95公頃,地面的墓至少五萬門,是目前上大嘛是上早的漢人墓仔埔,文資處佮四位專家來到現場勘查。公民團體提報的古墓,包括李鎮源、228受害者林茂生、黃本淵等等,攏是台南歷史名人抑是𪜶祖先的墓,遮的墓主後代攏無贊成共墓徙走。

黃本淵後代,黃森隆表示:「這是來台灣出世頭一代,算阮的祖先,開基祖,所以希望會當保留起來,莫共振動。」

除了真濟名人,遮嘛有清代陸姓的六門墓排列,全部留落來,嘛真罕見,進前民政局拍算欲開發部份土地,引起反對的意見,公民團體發動連署,反對遷墓,希望這个全台灣上古早的漢人墓,全區保留。

台南市文資處長,林喬彬表示:「這擺提報49門,有的是內面、有的外口面,分散範圍非常闊,按算分五个梯次,進行現地勘查。」

文資案提報人,吳昭明表示:「為著利益共寶貴的墓遷走,阮預定欲提報一百門,當然遮有價值的毋但一百門,每一个人的祖先,每一門墓攏是珍貴。」

針對南山公墓的遷墓爭議,計劃目前暫停,文資處表示,第一階段文資調查年底會完成,仝一个時間,嘛啟動文資審查程序。

相關新聞

專題|全台敬老金大調查