嘉義阮劇團教新住民搬戲 互相認捌多元文化

嘉義市的社會處,為著欲予新住民家庭體驗臺灣文化,邀請劇團教新住民佮𪜶的序細搬戲,用表演的方式,認捌多元文化。

13位新住民做伙搬戲,用趣味的故事佮演出,講出家己的夢想。嘉義市政府為著欲予新住民體驗台灣多元的文化,舉辦文化培力計畫,來自無仝國家的新住民,透過課程互相認捌。

參加學員,邱小姐表示:「逐家對無仝的代誌攏會有無仝的看法,就會當去學一寡仔無仝的經驗,因為內底嘛有一寡序大。」

嘉義市社會處長,林家緯表示:「舊年是咧講新住民來到台灣了後的生活,阮今年就是講𪜶當初來遮的夢想。」

這是第二屆的新住民文化培力活動,嘉義市政府嘛邀請在地劇團來指導𪜶用戲劇的方式,展現𪜶生活當中,無仝的另外一面。

學員家屬,黃先生表示:「我是第一改看伊佇舞台頂按呢表演,我感覺佇內底我看著伊新的一面,這一面我感覺是我一直以來,毋知影的一面,感覺誠感動。」

阮劇團團長,汪兆謙表示:「我感覺這是一个雙方面的了解,咱透過這爿的溝通,透過這款的了解知影𪜶的故事,雙爿了解家己的內容,戲劇佇這內底的一个角色,算講是一个催化劑,猶是一个關節的角色。」

阮劇團指出,執行計畫的時陣,嘛透過新住民猶閣𪜶序細的分享,認捌一寡仔東南亞的文化。嘉義市社會處表示,這擺社會服務佮藝術的合作誠成功,希望未來相關的影響會當閣增加,毋但照顧𪜶的生活,嘛豐富𪜶的內心。

相關新聞

專題|全台敬老金大調查