新竹南山社區推"藝術釘根" 𤆬居民畫在地故事

新竹縣南山社區的居民,這幾冬佮新竹在地藝術家做伙創作「環境藝術」。往過毋捌畫圖過的社區序大,這陣欲透過家己的藝術創作,表現地方特殊的故事。

社區序大透過畫圖筆,畫出心目中的家鄉,閣揣老師來上課予家己閣較認捌故鄉。新竹縣這幾冬推動社區生活藝術釘根的計劃,希望地方民眾毋但對家鄉有認同感,嘛展現出地方特色。

社區民眾,陳德勝表示:「我對畫圖是無經驗,因為我上色實在上了無講誠好看,嘛是拄開始學。」

關西鎮南山社區理事長,溫美容表示:「序大從來嘛無畫圖過,有槌染嘛毋捌用過,所以序大攏真歡喜來上課。」

來參加活動的社區序大人,對課程攏感覺真趣味,嘛真歡喜會使保存家己的藝術創作,透過記錄在地生活故事,予後代囝孫看會著。

新竹縣文化局長,李安妤表示:「推動藝術就是生活,生活就是藝術這个概念,予藝術會使融入居民的生活當中。」

未來社區嘛會規劃導覽活動,𤆬有興趣的民眾直接行入社區,了解在地故事。

全台敬老金大調查

相關新聞