歇熱+疫情停課 濟學生捷用3C開學近視變重

學生歇熱結束了後,學校恢復上課,毋過煞有病院發見開學了後,學生因為近視來揣醫生的情形有變濟,有可能是因為疫情停課期間閣加上歇熱,傷捷使用3C產品所引起的。

囡仔配合老師來檢查視力,歇熱結束,學生拄開學這段時間,攏愛來進行身體檢查。病院就有發見,因為近視的問題,最近來病院的人有較濟。

嘉義長庚眼科主治醫師,陳肇寅表示:「新冠肺炎整個疫情之下,會造成講咱戶外的活動減少,囡仔長時間佇厝裡,做遮的室內遠距教學,這兩項重大的原因造成講,阮發見這一冬來,近視的比例明顯有增加。」

有學校表示,目前佇學生的視力檢查當中,確實有囡仔近視度數有增加,認為這佮停課、歇熱期間3C產品使用過量有關係,學校嘛開始安排予囡仔目睭歇睏的活動。

朴子祥和國小校長,陳志峰表示:「阮會佇早自修的活動時間,用分流的方式,阮一二三年級就做健康操,然後四至六年級就會去阮的運動埕,然後各班𤆬落去用走矣。」

嘉義長庚病院表示,家長應該愛注意囡仔視力檢查的結果,若發見有問題,一定愛揣醫生來瞭解。而且嘛愛有使用3C產品的好習慣,才袂予囡仔近視的問題,愈來愈嚴重。

全台敬老金大調查

相關新聞