民雄大士爺火化升天 防疫無踅境.祭典總圓滿

法師入場，辦佇民雄街仔的大士爺火化昇天法會，嘛準備開始，佮舊年無仝的所在是，今年受著疫情影響，無暗火嘛取消踩街。

現場的民眾指出：「規模縮小，出入的管制有變較嚴，進前渡桌彼爿閣會當入去，今年攏直擋咧」

嘉義縣民雄鄉福權村長賴宥程表示：「疫情的關係，所以一寡人較毋敢群聚，所以佇這个火化場，嘛差不多仝款意思」

今年因為疫情，廟方共舞台改做4公尺懸的神壇，進前扛轎踩街的活動，今年嘛改做予大士爺直接坐車到火化場。廟方表示，配合防疫的原則，希望會當予傳統宗教活動順利圓滿。

民雄大士爺廟董事長周漳炎講：「因為阮有共宣導，進前文化祭前一禮拜就有宣導矣，咱儀式就簡單隆重」

透過各界人士的點火儀式，對舊曆21開始連紲三工的民雄大士爺祭，算是圓滿結束。在地民眾表示，疫情禁止排擔仔，大士爺無踩街，閣坐車來火化，嘛算是一改佮過去無仝的體驗。