人權館主題展換新 互動裝置現白色恐怖新史料

國家人權博物館成立三冬以來,頭一改換主題展覽,用設備佮民眾互動,呈現真濟白色恐怖時期的歷史現場。甚至有真濟歷史資料,是咱往過毋捌聽過的代誌。

白底烏字,寫出「白色恐怖歷史現場」這幾字。國家人權博物館自3冬前成立以後,頭一改換主題展覽,特別用互動裝置、呈現親像是左翼案件的地圖分布,也囥入一寡仔軍隊內底較少人知影的代誌。

國家人權博物館展示教育組的專案助理何友倫講,「有足大比例的政治受難者,尤其是外省籍的政治受難者,in遮的底層士官兵,其實是佇便所留一寡亂皂的文字。遮的文字,當然真濟攏是反對國民黨的一寡內容,對in來講就親像,無履行承諾的控訴。」


這改展覽、分做三个主題,包括威權統治、政治犯佮景美園區,猶閣有轉型正義,文件、受難者數據等等,也加入促轉會這幾冬的調查,嘛透過受難者的記持,紹介台北市以外的不義遺址空間是啥物模樣。

國家人權博物館展示教育組的專案助理何友倫也紹介講,「阮共每一个空間配合逐个政治受難者的口述,然後予伊透過口述,呈現這个身體的感覺。譬如講in會強調講,彼陣這个空間可能真狹抑是按怎。」

來看展覽的民眾也感覺講,「上尾伊這爿是有真濟遺書等等的,我感覺毋管是任何政治立場的人,攏會當透過這个部份,有較相倚的感覺。」

國家人權博物館表示,透過展覽的整理,in毋但想欲予參觀者了解過去,嘛希望逐家思考當前的人權議題,以及未來如何避免人權的侵害
記者 
 

全台敬老金大調查

相關新聞