家扶中心助學金募款 望助弱勢學生疫情中就學

手捀的甜路，桌頂的餅佮麭攏是家己做的，這馬讀餐飲系的沛誼、是受臺北家扶中心幫助的個案，為著完成成做甜路師傅的夢想，伊一面提家扶中心的獎學金讀冊、一面去甜路工作室做師仔。

沛誼表示：「媽媽一開始真反對我讀餐飲系，反對的原因主要是餐飲系的食材費，佮總舖師的證照費攏愛另外納」

另外一个個案小薰，仝款為著所費，煩惱家己敢會使順利畢業，嘛選擇工讀趁錢。

小薰也講：「生活費、宿舍費、三頓嘛可能愛佇外口解決，加上學雜費，應該是一筆真可觀的數字」

家扶中心表示，一般大學生有百分之四十五會選擇工讀；家扶中心的大學生有工讀的比率是百分之八十，比並之下，弱勢大學生為著各種所費，就較會影響著學習。毋過親像沛誼，就因為疫情關係，工讀排班攏取消了了。

臺北家扶中心主任謝曉雯指出：「一般工讀的囡仔，有一寡是為著累積工作經驗，In毋是為著錢。毋過弱勢學生無通選，毋是為著體驗生活，是為著錢」

家扶中心講，疫情之下，學生猶是需要所費，台北家扶中心逐年攏著為250个學生攢總共500萬的獎助學金。今年因為疫情，募資的狀況是䆀真濟，希望各界人士會使鬥相共，予弱勢學生的學習機會會當加較平等。