"拍斷跤骨顛倒勇" 清大骨癌學生著總統教育獎
發布時間：
更新時間：
清華大學有一位學生，李欣恬，國中的時著骨癌，經過13擺的手術，大學二年倒跤閣鋸掉，毋過伊並無失志，蹛院的時陣，毋但申請遠距離修課，閣共家己鋸跤的心情寫落來，提著文薈獎的大專社會組第一名。伊嘛受著今年的總統教育獎的肯定。
秀氣的面模，閣加上甜蜜的笑容，雖然講因為著癌失去了倒跤，毋過伊李欣恬猶原樂觀面對，共家己的故事寫出來，毋但提著文薈獎大專社會組第一名，閣受頒今年的總統教育獎。
清大學生，李欣恬表示：「這幾年來體會上深的就是，這馬看起來真䆀的代誌，無一定是上䆀的，最後攏有可能是"A blessing in disguise."。性命會家己揣著出口。」
另外一位穿布鞋咧走運動場的劉育瑋，細漢時因為破病視力變0.03，雖然讀冊比人較食力，毋過伊毋但成績優秀，閣佇全國身心障礙運動會提著誠好的成績。
清大學生，劉育瑋表示：「佇學習頂懸，除了倚靠各種的放大軟體，閣有放大的紙本以外，阮閣較需要開比別人閣較濟的時間。」
這改清華大學特別褒獎，予包括李欣恬以及劉育瑋等等17名學生，嘛希望藉in的故事，鼓勵逐家珍惜性命。
