中元咧欲到 新竹市推祭拜環保袋籲民眾減燒金

中元普渡,為著欲減少燒金造成的汙染,新竹市環保局推出中元環保拜拜的袋仔,內底有普渡用的面巾、平安米、普渡旗等等,會使講一般普渡愛用的物件攏共你攢便便。

橐仔內底,有面巾、普渡用的旗仔、平安米等等,這是新竹市連紲第六年推出環保拜拜的袋仔,民眾只要捐100箍予公益團體就會當提著,做愛心嘛兼做環保。


民眾陳小姐表示:「中元的時陣,家家戶戶攏會燒金,阮感覺空氣誠䆀,對空氣品質無好。」

民眾顏先生表示:「一方面會使幫助弱勢佮公益團體,阮感覺按呢是誠好。」


根據統計,過去5年,有募著倚20萬的公益金,若照捐100箍減燒1公斤金紙來算,等於減燒1991公斤的金紙,差不多減排2987公斤的二氧化碳。


新竹市環保局副局長洪明仕表示:「倚欲3千公斤的減碳量的成績出來,也就是過去燒紙錢會汙染空氣,阮用無仝款創新的方式,予空氣品質較好。」


環保局嘛鼓勵民眾,共欲燒的金紙交予環保局做伙處理,毋但環保,佇疫情期間,嘛會當避免群聚的風險。
 

相關新聞

專題|全台敬老金大調查