染病死亡限24點鐘內火化 新竹煞有遺體囥3工

竹東一位55歲的婦人人，佇長照中心穢著新冠肺炎，原底經過病院治療，初四已經解除隔離徙到一般的病房，想袂到初六病情惡化過身。遺體徙來殯儀館，幾工後殯葬業者準備火化，看著死亡證明書頂懸註明「新冠肺炎」，工作人員全攏掣一趒。
殯葬業者蔡先生表示，一定有風險，到第三工辦火化才予人發現，而且所有工作人員，攏無人知影死亡原因是這。

縣政府趕緊對外澄清，這名婦人過身時，CT值已經超過30，並無傳染的風險，所以毋免24點鐘內火化，未來嘛會要求病院方面愛註明清楚，避免造成誤會。

醫院副院長林鎮宇表示，依照一般死亡原因的註明，嘛是會共一開始著病的原因寫佇頭前。

新竹縣衛生局長殷東成：「病院方面會加強溝通，請病院拄著這款情況的時陣，證明書頂懸攏愛寫閣較清楚。」。

經過通報了解，業者初九已經協助家屬完成遺體的火化，為著安全，工作人員徹底消毒，逐家總算是敨一口氣。