北市聯合病院醫護免費蹛旅館 資格變嚴引不滿

對舊年開始,臺北市政府佮飯店合作,提供警消、醫護人員、會使來報公數蹛旅館,予前線人員毋免煩惱轉厝內會穢予親人。毋過臺北市聯合病院工會煞煏講,今年7月開始,因為聯合病院的災害準備金得欲用了矣,申請的資格變甲真嚴格,予有需求的醫護人員真不滿。


捒開門,整齊的房間佮膨床,因為警消醫護人員有蹛長期的需求,佮一般客房相比,業者閣準備較濟糞埽桶佮滾水。台北市對舊年開始佮濟濟飯店合作警消醫護加油棧,提供警消醫護人員免費蹛房,予in免驚厝內的人因為家己的工課有感染風險,毋過這項措施7月開始煞有變化。

臺北市立聯合醫院企業工會理事長郭簣瑩:「聯合病院家己共資格變嚴格,變成干焦彼工有照顧確診病患,佮採檢工作的人才會使蹛。」。

臺北市立聯合醫院企業工會秘書高若想:「門診佮一般病房,攏予病院算做綠區,綠區就是病院認為安全的區域,袂使蹛警消醫護加油棧需求的區域,但是實際上北市聯醫每一个院區,攏有發生過院內感染,攏有發生過群聚,阮員工就是隨時面對上危險的狀況。」。

工會講,病院會按呢做,是因為災害準備金欲用了矣。工會認為,聯合病院錢無夠應該向台北市政府討,毋使共蹛房的資格變嚴格。

臺北市立聯合醫院企業工會秘書高若想:「市府需要提供充足的經費,市府既然敢喝政策,就愛提供夠額的經費,第二,北市聯醫應該維持原本的資格,莫主動變嚴格。」。

臺北市立聯合醫院秘書室主任簡雅芬表示,對109年到這馬,有關蹛警消醫護加油棧的資格,攏是予照顧確診、疑似確診,佮採檢的同事來蹛,對109年到這馬攏無變較嚴格過,阮這馬只是予按呢的狀況維持繼續執行。

聯合病院講,對舊年到這馬,已經向市政府申請4擺的災害準備金,總共2600萬。過去因為疫情較緊張,有小可放冗資格,這馬只是共資格改轉來,未來會看員工的需求,隨時調整,避免浪費資源。



 

全台敬老金大調查

相關新聞