雙北自8/3准店內食 辦桌.麵擔成本懸猶躊躇

雙北地區,對8/3開始放冗餐廳用餐的限制。火鍋店、烘肉店也講:人客開始轉來差不多有3成。毋過對辦桌的餐廳、一般的麵擔仔來講,頭家猶咧考慮防疫、成本佮員工的安排。

火鍋沖沖滾,雖罔干焦會當隔隔枋分菜、開講,不過過了兩個外月總算會當和朋友鬥陣去餐廳食飯,人客攏講足歡喜。

來消費的民眾表示:「是無差啦,猶是會當按呢講話」、「這馬去夾菜攏愛囊手套、掛喙罨,較早毋免」。

去斟飲料、挖冰淇淋、khat醬料,人客攏著愛掛餐廳提供的手套,菜蔬區這部份就由店員替你夾。

連鎖餐飲集團公關李晨馨講:「以目前的狀況來講,用餐期間的滿桌率差不多八九成。但是因為配合所謂的防疫政策,就算今仔日攏坐滿,阮的營業金額,干焦轉去到往過的三四成左右」。

不過對賣桌菜的業者來講,愛做隔枋、閣愛照中央規定有專人分菜,這站仔閣咧設計隔枋,頭家欲先繼續拚外送生理,伊表示:「比較較低單價的消費,我嘛毋知影欲按怎加一个跤手去替伊分菜。本底就欲得欲經營袂落去,這馬閣愛加派一个跤手,一下子就愛關門矣」。

抑若對賣食的細間店頭表示,疫情若無完全結束,這馬繼續維持予人包轉去。

店家指出:「對阮來講是無符合經濟效益,準若政府決定開放內底食,會當無受限制,我才會開放」。

疫情繼續維持二級警戒,餐廳業者帶條件開放內底食,不過大部份業者攏猶咧觀察。

全台敬老金大調查

相關新聞