高雄舊火車頭徙位 原底帝冠式建築成做新大門

2500噸重的高雄老車站，下底疊36支jaki佮鐵枝，就像穿趨冰鞋，準備欲沓沓仔徙轉去車站原底的所在，26這工提早開始徒位的大工程。

道局南部工程處處長 劉雲生:「一工大概阮徙動的進度是1.4米，4.8米大概若是順利，阮預估三工到四工完成，上慢袂超過七工。」

交通部長王國材，佇高雄鐵路地下化工程開始的時陣，是高雄市交通局長，伊見證高雄老車站轉外家的歷史，高雄老車站的四角形厝頂，親像戴一頂官帽，是日本時代特有的帝冠式建築，目前已經是歷史建築，這改創下全台上大文物徙位的紀錄。

交通部長 王國材:「一个城市的記持，若是一个新的建設，就共伊抹除是真可惜，這馬因為有保留這个80年的車站，轉去高雄新車站區中央，予高雄人永遠會記得這个車站的過去。」

對26開始高雄老車站先往北爿徙4.8米，然後閣對西爿徙將近58米，按算九月底會當搬來高雄新車站的大門，明年一月定位，以後欲成做歷史展覽的空間。