風颱未到高雄已摔大雨 菜農拚採收.菜價已翻倍

高雄前兩工仔拚大雨,而且風颱近倚,農民趁這兩工仔好天、趕緊搶收。今仔日的菜蔬是比平常較濟,菜價也起一倍。

已經欲中晝,工人閣咧無閒割油菜,高雄這幾工天氣無好,有時落雨有時出日頭,聽講閣有風颱,趁雨猶未落,菜農倩工人趕緊採收遮的油菜佮湯匙仔菜。

菜農許先生:「風颱來隨落雨,就攏害去矣,緊割起來按呢。」

因為烟花風颱欲來的消息,毋但梓官的菜農真無閒,農會集貨場人員收貨、搬貨閣愛洗菜,這兩工送來菜蔬的量,攏比平常加差不多兩成至四成,22這工可能有將近3噸。菜農:「白菜、空心、油菜今仔日有收較濟,比平常收較晚,收較濟嘛收較晚。」

梓官區農會供銷部主任劉振華:「原底佇雨前一公斤差不多十箍,這兩工一公斤起,起差不多二十箍左右,預期心理較大,無正經遮的菜蔬並無啥損傷著。」梓官農會表示,只要菜農欲割,集貨場攏總會收,送來的菜蔬攏會急速降溫,先共冰起來,若是風颱期間落雨傷著菜蔬,彼時陣就會有冷藏的菜蔬通食。

相關新聞

專題|全台敬老金大調查