"奉命釋法" 白色恐怖時期大法官釋憲內幕公開

促轉會最近有發表一本新冊,內面是收集白色恐怖時期「8號解釋文」的相關檔案,頭一擺予逐家了解,彼當時的大法官,是按怎對政治犯的判決,做出解說。

「白底烏字奉命釋法:大法官佮轉型正義」,這是促進轉型正義委員會最近所出的新冊,也是第一本台灣社會針對白色恐怖時,對幾號重要判決的解釋內容,像大法官是啥人?過程按怎形成? 做頭一改公開。

促轉會代理主委葉虹靈表示,「後來佇努力之下,司法院總算是共遮的檔案徙到檔案局,這寡是政治檔案,也做了就是講共所有的,這寡檔案隴做公開。」

促轉會表示,這本冊整理佮延續舊年舉辦研討會的成果,只不過彼當陣大法官的名猶袂當公開。而且往過威權時期,逐家對軍事審判,猶閣有解嚴後政治犯的上訴等等,攏干焦通知影結果,毋知產生的過程。這本冊會先公開8號大法官的解釋的內情,未來閣有80幾號解釋,會陸續透過各種方式向外界公布。

促轉會代理主委葉虹靈說明,「未來因為閣有真濟號解釋,檔案也已經徙到檔案局,只是促轉會是一个任務型機關,所以阮會希望講遮的檔案通予全民來使用,予學界攏通共同來使用,後續研究無一定愛由促轉會來做。」

促轉會表示,現階段就是予一寡檔案閣較透明,共真相解封。另外,考慮防疫,促轉會按算初十用線頂方式來舉辦重返釋憲現場這本冊的發表會,透過專家學者的討論,予逐家了解這段歷史對民主過程的影響,最近也會共數碼冊囥佇網路。

全台敬老金大調查

相關新聞