新竹尖石水蜜桃大出 煞拄著疫情無遊客來交關

新竹縣尖石鄉的水蜜桃當著時，這站仔山頂是攏無遊客，農民今年就改蹛線頂來賣水蜜桃，降低疫情的衝擊。
 

一粒一粒粉紅飽滇的水蜜桃，看起來就想欲咬一喙，新竹縣尖石鄉種水蜜桃的面積有65公頃，今年差不多有520噸的產量，因為高海拔的環境，這搭的水蜜桃甜度閣較懸。

農民高藝禎:「日頭一定愛有夠，一定愛照有夠十幾點鐘，天一光到日頭落山攏是全日照，閣來就是空氣好，山泉水的滋養。」
農民辜怡婷:「泰崗部落日頭充足，所以種出來的水蜜桃甜度懸、水份飽，食過的人攏真佮意。」

進前水蜜桃主要是賣予來山頂𨑨迌的遊客，這改因為疫情，山頂無遊客，為著幫助果農，縣政府趕緊成立平台，佇網路頂懸賣水蜜桃。農民田春香:「無遊客起來山頂𨑨迌，過去2年攏無出，今年罕得出矣，無遊客來買，毋知影水蜜桃欲賣去佗位。」

尖石鄉果樹產銷班長江仁義:「阮一年度的收入就是倚靠農作物，若是農作物無好賣，會造成阮的經濟來源，抑是囡仔上課佮經濟有誠大的打擊。希望盡量攏佇網路頂懸買，抑是直接佮農民聯絡，欲按怎聯絡，鄉公所攏有阮的資料。」

疫情改變民眾生活，嘛對經濟發展造成衝擊，農民只好寄望透過無仝款的方式，會當降低疫情帶來的影響。