明年大學分科測驗按延後 家長驚袂赴揣厝.入學

這馬的高中考大學的考試,有分做學測佮指考。毋過,教育部進前考慮,欲共111年的大學指考,改做分科測驗。而且共本底七月初的考試,延到七月底。這消息一出來,真濟人認為,大學袂赴安排新生入學,學生也有做兵、稅厝的問題。要求教育部愛好好仔規劃。

往過高中考大學,指定考試科目的部份,七月初考了八月初就放榜,毋過教育部研議欲將111年的大學指考變做分科測驗,而且延到7月底舉辦,八月底才放榜。引起一寡師生佮家長反彈,認為有的大學9月初就開學,連接的時間實在傷過近。
 
全國學生聯合會理事長李嘉濠:「正常來講,其實同學入學了後,會收著學校,就是譬如講敢欲抽宿舍,抑是譬如講入學通知,佇八月廿五放榜到九月初一入學,其實只有短短的五工,其實按呢
,其實是一个真譀的狀況。」
 
李嘉濠也講,有的高三學生也會利用歇熱,先申請分階段做常備兵役的機會,考試時間延後也可能影響in的權益。閣較有家長認為,有錢的家庭,就會相爭共囡仔送去補習,恐驚會擴大城鄉差距,也有教授點出幾若項可能出現的問題。
 
台大電機資訊學院院長張耀文:「逐家知影咱七月中以後,就是咱台灣的風颱季,掠準佇七月底考試,足容易去拄著風颱,毋知影教育部敢有法度承擔,尤其是外島的部份,去拄著風颱的時陣,這个配套的措施。」

張耀文表示,欲予高三學生學習完整,應該著對課綱等等來調整,毋是頭疼醫跤跤疼醫頭。面對濟濟外來的意見,教育部是回應,目前猶未定案,會請招聯會參大學、高中溝通;招聯會也當咧召開教務長工作小組會議,等討論有共識才會做決議。

全台敬老金大調查

相關新聞