工輔法滿一年 環團:違法工廠"隨報隨拆"無實現

「工廠管理輔導法」佇舊年3/20公告施行,到今欲滿一冬矣。環保團體今仔日佇行政院外口召開記者會,認為政府根本無共「全面納管」、「隨報隨拆」做甲到,據在違規的工廠直直起,毋但造成汙染,嘛有安全的疑慮。

2019年10月,台中大雅一間違法鐵厝工廠發生火災,造成2名消防人員過身去,這種違法鐵厝工廠毋但會造成安全問題,違法起佇農地頂懸,嘛有汙染的疑慮。3/16,環保團體佇行政院門口開記者會,in指出《工廠管理輔導法》施行連鞭欲1冬矣,但是當初政府講欲全面納管、隨報隨拆的承諾,執行起來煞無講蓋積極。

環保團體認為,政府對農地違法工廠的定義真有問題,in指出,農地上的建築,只要毋是農業的使用、就應該拆除,若無就有污染的疑慮;消防員工作權益促進會嘛指出,這種鐵厝工廠對消防人員來講,是上危險的。

經濟部中部辦公室表示,判定是毋是工廠,是愛看建築內底敢有加工行為等等,有真濟判斷程序,地方政府也會主動去檢查水電用量無正常的鐵厝,是一直攏有咧處理遮的問題。
環團嘛要求,處理農地違規建築,袂使干焦靠一个部會、抑是地方政府,in點名行政院應該愛出面,集合迒部會的力量來解決這个問題。行政院回應,會加速違規調查佮處理的時間,嘛會協助地方政府執行遮的業務。

全台敬老金大調查

相關新聞