寒流接紲到 嘉義魚塭緊抽地下水保溫

嘉義義竹、是嘉義縣、養殖魚業上大的生產地區，元旦彼陣寒流、已經造成一寡損害。初7、閣有寒流來，當地漁民煩惱，受傷的魚猶未復元，這馬閣有寒流要來，為怕造成另一波的損失

溫度較高的地下水放落，窟仔內底的驚寒的魚仔，連鞭就徛過來。漁民講這個水是窟仔下底的地下水，袂予窟仔的水溫度降傷緊。

養殖魚民講月初的寒流，予嘉義縣有一寡魚仔有去傷到，目前猶未復元，第二波閣較濕冷的寒流又閣來，可能就會造成較大的損失。毋但養殖漁業受影響，佇布袋東石的蚵仔農，也因為東北季風帶來的海湧，嘛趕緊來採收蚵仔。

因為疫情的關係，國內消費需求減少，縣府為著避免魚仔大出影響價數，舊年就有開放予漁民來疏養，目前全縣5800公頃的養殖面積，有1600公頃申請疏養。漁民表示縣府雖然攏有呼籲要注意禦寒，但是如果紲落來的天氣予窟仔內底的魚仔袂勘得，今年頂半年魚仔的收成，可能就會受到影響。