臺文欠字問題 臺灣設計公司推臺.客合用字體排解

臺語有咧推廣，也有真濟民眾開始學臺語字，毋過真濟臺語字攏愛造字，字體也毋通選擇。就有臺灣的字體設計公司，推出會當支援臺語、客語拼音、捷用漢字的字體，對語言傳播有誠大的幫贊。

要拍台文字．煞定定拄著字體無支援的問題，這馬台文的書寫佮應用越來越四常，但是支援台文的字體煞真有限，這馬有字型公司特別推出頭一套支援台、客語拼音佮捷用漢字的字體。

因為漢字的數量濟，加上台語的特殊用字，就算字體推出矣，團隊到今也繼續咧補充欠字的部份。

雖然各種字型佇生活中四界攏看會著，但民眾對這途煞真生份，欲做一个字型設計師，練字是基本功，為著欲予大眾對字體有較濟的認捌，這間字型公司嘛行入校園，共推廣教育的責任擔起來。

除了佇校園內，嘛佇網路頂，建立交流討論的機會。

街仔路的招牌看板、超商內的商品標示，甚至刻印仔，其實攏是咧選字體。民間的字型公司，向望透過教育推廣，予濟濟人會當對字體設計、應用有閣較濟的認捌佮感受。