情境式演說著特優 國校生看圖講臺語誠輾轉

今年全國語文競賽，臺語演講有試辦一種情境式演說，予學生囡仔現場抽題目，看圖講古，甚至評審閣會現場問問題，實在是真刺激。明年開始會正式加入比賽項目，咱來看今年著獎的囡仔，是按怎練習的。

拄提著本土語演說全國第一名，劉紫瑜來佮四年仔的學生分享，逐家攏嘛誠好奇，到底伊的台語有偌好？


今年本土語文情境式演說，是第一擺現場抽題，看著四格圖就愛隨準備演講內容，劉紫瑜毋但代表高雄市參賽，佇頂個月30，閣提著國小組全國第一名，實在無簡單，因為伊對四年仔才開始練台語。


看劉紫瑜上台講台語，語音佮聲情攏真媠，原來伊自細漢佮阿兄做伙學答喙鼓，老師認為，這對伊學習演講，真有幫贊。


劉紫瑜講，只要用心學，會發現台語真媠，伊嘛希望逐家攏來講台語。